Manipur-a zirlai 2 thihna kaihhnawihah mi 4 man; ITLF-in Churachandpur-ah shutdown an puang

Central Bureau of Investigation (CBI) chuan July thlaa Meitei zirlai pahnih ruk bo leh thah an nih chungchang an chuina kal zelah, Pathianni khan hill district-a Churachandpur aṭangin mi pali an man thu an puang. An mi man zingah hian hmeichhe pahnih an tel.

CBI-in an mante hi Paominlun Haokip, S. Malsawm Haokip, Lhingneichong Baite leh Tinneilhing Henthang te an ni.

Manipur chief minister, N. Biren Singh chuan an mi mante hi CBI leh Manipur police-te'n Imphal aṭanga Guwahati lamah thlawhtheihna hmanga an hruai chhuah nghal thu sawiin, an mi man zinga mi, Lhingneichong Baite fate pahnih, kum 9 mi leh kum 11 mite chu hruai tel ve an nih thu a sawi bawk. Naupangte erawh hi chu a hnuah Assam Kamrup Metro district-a District Child Protection Officer hnena hlan an ni thung.

CM Singh chuan thil sual titute chu hremna na ber pek an nih tur thu sawiin, zirlai pahnih ruk bo an nih hnua thah an nih leh kawnga inhnamhnawihte man an ni chu lawmawm a tih thu leh, misual chu tlanchhe rih mah se danin a um phak leh zel ṭhin thu a sawi. Singh chuan thil sual titute man an nihna kawngah Army leh paramilitary force, Border Security Force te, CRPF leh state police-te' n tha an thawh ṭheuh thu leh fak tlaka hna an thawh vek thu a sawi bawk.

Churachandpur-ah shutdown puang

CBI-in Meitei zirlai pahnih thihna thlenga inhnamhnawih nia puh, finfiahna mumal nei loa mi an man chungchangah Indigenous Tribal Leaders Forum (ITLF) chu lungawi loin, an mi mante thlavang hauhna atan Churachandpur pumpuiah tiam chin awm loa inkharkhip, indefinite shutdown an puang

Kuki Students Organisation (KSO) pawhin CBI-te'n rinhlelh thila an mi mante zinga pahnih, S. Malsawm leh Paominlun te chu Meitei zirlai pahnih thihnaa inhnamhnawihna nei lo tih an hriat chian leh, hel pawla tel an nih loh thu sawiin, KSO Leimata Block-a an President leh General Secretary ni lai an nih zawk thu an sawi. ITLF-in shutdown an puan chu an thlawp thu an sawi bawk.