Assam-Meghalaya border : KHNAM-in CRPF dah tum an duh lo

Meghalaya-a political party, Khun Hynniewtrep National Awakening Movement (KHNAM) chuan tun hnaia Assam leh Meghalaya sorkarin ramri buaina chungchangah inbiakna an neih dan chu a lungawithlak tawk lo tih an sawi.

KHNAM chuan state pahnihte'n buaina an neihna hmuna state police force-te thlak a, an aia central reserve police force (CRPF) dah tumna chu an duh lo tih an sawi. KHNAM working president, Thomas Passah chuan CRPF chu BJP sorkarin a duh dan anga a thunun theih a ni tiin, ramri buaina hmuna duty-tir an nih chuan Assam-a BJP kaihhruai sorkar duhsak zawnga an khawsak a hlauhthawnawm thu a sawi a ni.

Passah chuan mipuite him zawkna atan Meghalaya sorkar hnenah border outpost-a Meghalaya police force duty-te chu hnukkir lo turin a ngen.

September 30 khan Assam leh Meghalaya chief minister-te meeting chuan ramri chungchanga Khasi leh Karbi hnamte intihbuaina thlenna, Meghalaya-a West Jaintia Hills district leh Assam-a Karbi Anglong district inrina, Khanduli-ah chuan state police-te dah loin, an aiah neutral force CRPF dah an lo rel tawh a ni.