ULFA-I mi leh sa 2 Assam Rifles kutah inpe

Assam hel pawl, United Liberation Front of Asom-Independent (ULFA-I) mi leh sa pahnih chuan Thawhṭanni khan Arunachal Pradesh-a Assam Rifles kutah an ralthuam, 0.32 pistol pakhat leh 9mm pistol pakhat nen an inpe.

ULFA-I mi leh sa Assam Rifles kuta inpete hi Manjit Gogoi, Nilotpal Asom tia hriat bawk leh Rohini Gogoi, Upen Asom tia hriatte an ni a, Assam Rifles kuta an inpek chhan erawh hriat a ni lo. Heng mite hi a ruka Indo-Myanmar kaltlanga Assam-a buaina siam tura rawn lut nia hriat an ni a, ULFA-I-ah hian nikum khan lak luh an ni tih Assam Rifles chuan an sawi.

ULFA hi April 7, 1979 khan Rang Ghar, Sibsagar-ah din niin, mahnia inrelbawl, sakhaw awm lo Assam din duhna avanga ralthuam nena zalenna bei an ni. Report aṭanga a lan danin ULFA-I hian Myanmar bakah, Meghalaya-a Garo Hills leh Arunachal Pradesh-a Tirap leh Changlang district-ah te camp an nei tawh a, Nagaland-a Mon district leh Bangladesh-ah pawh camp an nei bawk. Assam Rifles te chuan kuminah ringawt pawh hian ULFA-I mi leh sa an ralthuam hlana inpe te hi tam tak an awm tawh niin an sawi. Assam Rifles hian September 29 khan Nagaland police-te nena ṭangkawpin NSCN (K-Nikki) hel pawla tel mi pathum manin, an ralthuam kawl lai, 0.32 caliber pistol, a mu leh indona hmanrua te an lo man tel tawh bawk a ni.