AP hi India ram a ni - US

United States (US) chuan Arunachal Pradesh chu India ram a ni a, China-in a ram nia a chhal leh, Line of Actual Control (LAC) pela sipai leh civil mite luh an tum ṭhin chu a pawm lo tih a sawi. 

US State Department official chuan Foreign Press Center briefing a neihah hemi chungchang hi a sawichhuak a, "Kum sawmruk dawn chu US chuan Arunachal Pradesh chu India ramah a pawm tawh a ni," a ti. Ramri chungchanga an  buainaah India leh China chu inbiakna  hmanga chinfel dan zawng tur leh, sipai chakna hmang lo tura an duh thu a sawi bawk. 

China chuan Arunachal Pradesh hi a ram chin nia chhalin, an state-a sorkar laipui hotute zin leh, sorkarin hma a laknate a lo sawisel fo ṭhin a ni. AP bakah tunhnaia Ladakh union territory pawh a pawm loh thu China chuan a sawi a, India chuan dan kalhin Ladakh UT hi a din a ni tiin, border area-a infrastructure dinte pawh a dodal a ni.