UNC-in Manipur Naga area-a AFSPA pawhsei an dem

Naga mipui intel khawmna pakhat, United Naga Council (UNC) chuan Manipur-a Armed Forces (Special Powers) Act, 1958 pawhsei a ni chu ṭha lo an tih thu leh, Imphal valley-a police station 29 huam chhung an tel ve lo chu inthliarna, uchuak taka duhsak lam nei leh rorelna lai lo tak nia an hriat thu an sawi.

UNC chuan boruak muanawmna leh buaina awm miah lohna hmun, Manipur-a Naga chenna area-a AFSPA pawhsei a ni tel chu an dem thu an sawi a ni.

May 3 aṭanga Manipur-a tualchhung buaina a chhuah aṭanga tharum thawhna leh buainain a kian san miah lohna hmu, Imphal valley-a police station 19 chhunga awmte AFSPA pawhseiin a huam ve lo leh, hetih laia buaina awm miah loa thlamuang taka mipuite chenna Naga area huamtir a ni leh si chu rinhlelhawm an tih thu UNC chuan an tarlang."July 1, 1997-a Indo-Naga inkahhai puan a nih hnu leh, 2015-a Government of India leh NSCN (IM) te'n thawhhona tura inremna an ziah hnuah pawh India sorkar leh Manipur sorkar hian inremna ziah an lak thutak lohzia lantirin Naga awmna chinah pawh he dan sual tak hi an la pawtsei ve zel a ni," tiin an thuchhuahah an tarlang. Awmze nei lo leh ṭul lo taka AFSPA pawhsei ṭhin chuan India democracy hmel a tichhia a, ram chhunga remna leh hmasawnna awmna tur kawng pawh a dal a ni tiin UNC chuan an sawi bawk.

UNC hian India sorkar chu Naga chenna chinah chuan AFSPA chu hlip vek tawh turin leh Indo-Naga inremna zaha, mipuite rin ngama awm turin a ngen. Khawvel pumpuiin Indo-Naga inremna chu an thlir ṭhup lai leh, Naga rama muanna a awm leh theih beiseina kara 1958 aṭanga AFSPA hman a la nih reng thu an sawi.