Sikkim : Eptu party hruaitute'n rorel lai party headquarters tlawh

Sikkim-a eptu party, Citizen's Action Party (CAP) chuan Thawhṭanni khan Gangtok-a rorel lai party, Sikkim Krantikari Morch (SKM) headquarters an tlawh a, 2022 inthlan neih turah boruak ṭha leh muanawm tak siam turin an ngen.

SKM hruaitute hian CAP hotute hi an lo dawngsawng ṭha hle a, an state-ah eptu pawl hotute'n rorel lai party headquarters an tlawh ṭum khatna a ni tih an sawi.

Tun hnaiah Soreng district-ah party meeting nei tura kal, CAP worker ṭhenkhat chu SKM mi leh sate'n an lo tibuai a ni.

SKM general secretary Pawan Gurung chuan Sikkim-ah politics kaihhnawiha thila buaina chhuak chu thil thar a ni lo a, tun hma lam pawha a thlen fo thu a sawi. Sorkar hmasa, SDF sorkar lai pawhin buaina hi a chhuak fo a, tuna boruak muanawm siam tura phuttu, CAP president Ganesh Rai pawh SDF youth activist a nih ṭhin thu a sawi bawk.

Gurung chuan SKM headquarters tlawhtu, CAP hruaitute ngenna siam chu an party chuan an lo ngaihtuah tur thu leh, chief minister Prem Singh pawh an sawipui dawn tih a sawi.

CAP thupuangtu, Mahesh Rai chuan SKM hruaitute nena inkawmna ṭha tak an neih thu sawiin, an lo dawnsawn dan pawh a lawmawm hle tih a sawi. "Kan ngenna thlente chu eng ang chiahin nge an zawm dawn tih kan hre lo a, mahse, theihtawp kan chhuah zel ang. Sikkim-a politics hmelhmang siam ṭha turin kan bei zel dawn a ni," a ti.