AP bulah China-in Trans-Himalaya Forum buatsaih dawn

China-in tun hnaiah India aiawh tura kal, Arunachal Pradesh infiammite visa a pek ve duh loh avanga ram pahnihte inkar boruak a ṭhat loh chhoh mek laiin, China chuan Arunachal Pradesh bul mai, Tibet-a Nyingchi-ah 3rd Trans-Himalaya Forum for Internationl Cooperation buatsaih a tum.

Trans-Himalaya Forum neih tumna hmun hi Arunachal Pradesh aṭanga km 160 vel chauha hlaa awm a ni. He hunah hian Pakistan acting foreign minister, Jalil Abbas Jilani pawh a tel dawn a ni.

China hian Arunachal Pradesh hi a ram chin nia chhalin South Tibet tiin a sawi ṭhin a, August thlaa 'standard' map a tihchhuahah pawh AP leh Ladakh khawchhak lama Aksai Chin region chu an ram chhung ang vekin a dah a ni. Arunachal Pradesh-a hmun hming ṭhenkhatte pawh hming hran a lo siamsak tawh bawk. India chuan China-in a ram chin anga AP a chhalna hi pawm loin a lo sawisel fo tawh a ni. Union sports minister Anurag Thakur pawhin thla hmasaa China-in AP infiammite visa a pek ve duh loh avanga lungawi lohna lantirin, Asian Games opening ceremony-a a tel tum pawh a lo ṭhulh phah tawh bawk.