Meghalaya-ah khuh damdawi lem siamna hmun dap

Meghalaya law enforcement-te chuan khuh damdawi lem siamna atana an hman, underground factory an hmuh chhuah thu leh an dap thu an puang. Helai hmuna khuh damdawi lem siamte hi a ngawl vei theih leh ruih theih tura sawngbawl an ni a, Bangladesh lama thawn ṭhin an nih thu thuneitute chuan an sawi.

Khuh damdawi lem siamna factory hi EastJaintia Hills distrcit, Khliehriat-a awm a ni a, thu an dawn ruk angin SP Jagpal Dhanoa chuan media-te hmaah thuneitute'n khuh damdawi lem bur 9,883 an man thu hrilhin, he damdawi lem siamna kaihhnawihah hian mi eng emaw zat an man nghal a ni. Heng damdawi siamna hmun hi chhui zelin, Ummulong-ah underground factory a awm tih hriat a ni a, factory enkawltu chuan khuh damdawi siamte chu Bangladesh lamah thawn ṭhin an nih thu a sawi a ni.

Police-te hian elcodyl khuh damdawi bur 600 bakah, a tihdanglamna bur 10, ei tur rawng thlakna bur 11, phensedyl ṭhahnem tak bakah damdawi siam dan chungchang inziahna bu eng emaw zat an man a ni. Underground factory aṭang hian carton te, phensedyl hming belna, bottle chhin leh damdawi bur pack-na khawl bakah, Rs. 11,000 an man tel bawk. An mi mante thu an zawh fiahna aṭangin police-te chuan damdawi lemte Assam lama phurtu an man theih phah bawk.