Thlasikah Covid-19 kai an pun chhoh a rinawm : Himanta Biswa Sarma

Assam health minister Dr Himanta Biswa Sarma chuan an state-a hri kai hmuh chhuah thar tlahniam ṭan mah se inthlahdah theih a ni lo tih sawiin, thlasikah Covid-19 kai hi an pun chhoh leh a rinawm thu a sawi. 

Sarma chuan Assam-a  hri kai thar zat chu a tlahniam tawh tih a sawi a, mahse Delhi-a hri kai tlakhniam hnuah a thawh hnihnaa hri kai an pun chhoh leh vak ang kha an ni ve thei reng tih a sawi a ni. 

Coronavirus leng mek dona kawnga an hmalakna chu theihtawpin an chhunzawm zel dawn tih a sawi a, fimkhur taka an awm zel loh chuan thunun theih lohin hri hi a darh leh chiam thei a ni, a ti. 

Assam hi hmarchhak state zingah Covid-19 kai leh he hri vanga thi tamna ber state a la ni chhunzawm zel. Hri kai hmuh tawh hi mi 1,83,812 niin an zinga 1,48,960 chu an dam leh tawh a, mi 721 in an thihpui tawh a ni.