Arunachal-ah BJP sorkar siam remti dawn lo

Arunachal Pradesh Congress MLA tlantau ṭhenkhat chuan Chief Minister paihthlak tak Nabam Tuki chu Congress Legislature Party hruaitu aṭanga paih an ngiat a, hei hi an state-a BJP kaihhruai sorkar tumna an dan theihna tur a ni tih an sawi.

Congress MLA 21 te hian Congress party-ah an nghet tih sawiin, an party president Sonia Gandhi leh Vice President Rahul Gandhi te an dodal lo a, Nabam Tuki nunphung leh hnathawh danah an lungawilo mai zawk niin an sawi.

Tun laia Arunchal Pradesh politics buaina ber chu senior party hruai-tu V Narayanswami vangah an puh bawk.

"Congress MLA kan ni. BJP sorkar niloin Congress sorkar siam kan duh. Kan hotu lute lakah buaina kan nei lo. Tuki hi hruaitu ber aṭanga paih a nih chauhin kan buaina hi a fel ang a, Congress sorkar chu Itanagar-ah hian a ding leh ang" tiin MLA lungawilote thupuangtu Pasang Dorjee chuan a sawi.

"Keini, congress MLA lungawilo te hi 21 kan ni a, BJP in MLA 11 an nei thung. Tin, Independent MLA pahnih an awm bawk. Arunachal hmasawnna tura ding kan ni. Congress kaihhruai sorkarna a nih dawn phawt chuan kan thlawp thei reng a ni" tih Dorjee chuan a sawi.

Dorjee chuan Nabam Tuki hian MLA 60 zinga 26 chauh lam ṭang a nei a ni a ti. MLA lungawilote chuan a tir aṭang khan Sonia Gandhi leh Rahul ten aw an chhuah an beisei reng tih a sawi. Dorjee chuan minister hlui leh congress hruaitu hlun ni bawk Kalikho Pul chu Chief Minister atan an hual tih a sawi.