Assam Governor-in Acharya-n house-ah sorkar hmalakna sawi

Assam Governor PB Acharya chuan Thawhṭanni khan Assam Legislative Assembly ah thu sawiin, state sorkar hmalakna leh hmasawnna hnathawhte, hmachhawp leh ruahmannate a puang. Governor hian MLA zawng zawngte chu sorkar hmalakna thlawp tur leh a hlawhtlin nan theihtawp chhuah turin a ngen.

Session-a Governor-in a sawihawnna a neih hi eptu lamin an auhbuai nasat vangin a tihtawi phah. Governor hian tun hnaia sorkarin thutlukna a siam thar - district thar pasarih siamte, sub-division siam belh, District Development Commissioner siamte, development block siamṭhatte, sorkar hnathawk hmei-chhia nau pawmte kum hnih chawlh pek, zalenna sualtu hnena chhawmdawlna Rs 20,000 pek te a sawilang a ni.

"Heng thutlukna siam tharte hi mipuiten hun rei tak an ngiat ṭhin chinfelna a ni mai lo a, sorkar hi mipuite nena inpawhna leh mipui tana thil ṭha zawk pek zung zungna tur thil a thlen dawn a ni" a ti.

"Kum 2001 a sorkar thar a din khan sor-kar sum dinhmun chu a pachhe hle a, sorkar hnathawkten thlabiin hlawh an la thei lo a, hna hmu lo an tam a, ṭhalaite an chau zo a, hmasawnna a kalmuang hle a ni. Mahse, kum 2001-02 a sorkar sum lakluh zat Rs vbch 2090.18 chu kum 2014-15 ah chuan Rs vbch 11,862 ah a zuangkai tawh a ni" tiin governor chuan a sawi.

Governor chuan Assam ram chhunga dan leh thupek kenkawh chu kum 2001 ngaihtuah chuan a mumal tawh hle tih sawiin, kum 2001 a mi 412 zet misual kuttuarin an boral a, kum 2015 ah chuan mi 10 chauh misual kuttuara boral an awm tih a sawi. Tun dinhmunah sorkar leh hel pawl 13 te chu inkahhai thuthlung an ziak mek a ni.

A sawi zelnaah Governor chuan, lehkhathiam hna hmulo tam lutuk chu micro, small and medium enterprises (MSME) din a nih vangin chinfel a ni thuai dawn a; sor-kar hmalakna leh rua-hmanna te mipui mawl ber hnen thlenga a thlen theih nan e-governance kaltlangin, SUGAM e-district hmangin kalpui mek a ni a ti.