Meghalaya-in Covid-19 dona atan Rs vbc 100 chuang hmang tawh

Meghalaya sorkar chuan hripui leng mek, Covid-19 dona atana cheng vaibelchhe 100 chuang a hmang tawh. 

State budget session chhun­zawmna neih mekah, Ningani khan chief minister Conrad Sangma chuan hei hi sawichhuakin, sorkar laipui leh state sorkar chuan kawng hrang hrangin hri dona atan hian hma a la reng a ni, a ti. 

Chief minister chuan, "Thla hnih chhung chu state sorkarin theihtawp chhuahin hri dona atan a bei a ni," tiin hri a len hnuah  health and family welfare department tan chuan cheng vaibelchhe 57.98 a pek thu a sawi a. 

Heng zinga Rs vbc 45.85 chu state sum aṭanga pek niin, Rs vcb 12.13 chu central lam aṭanga pek a ni, a ti. He sum hmang hian health infrastructure-te thuam ṭhat an nih thu a sawi. 

Hripui leng vanga inkhar­khipna, thla hnih chuang kalpui tawh chuan mipuite eizawnna, ei leh in leh an sum lakluh thlengin a nghawng na hle tih a sawi. Harsatna tawk mipuite chhawmdawlna tur hian sorkar laipui hnuaia Pradhan Mantri Garib Kalyan Yojana kalpui bakah, state sorkar pawhin a hranin ruahmanna tam tak a kalpui a ni, a ti. 

Inkharkhip vanga nitina inhlawhfa, hna thawk chhun­zawm thei lote chhawmdawlna pek an nih thu CM chuan a sawi a; construction worker sorkara in register mi 24,516-te bank account-ah Rs 3,000 ṭheuh thunsak an ni tih a sawi. Hei bakah hian Chief Minister's Relief Against Wage Loss Scheme hnuaiah inhlawhfa, sorkar in register ve kher lo mi 181,491 hnenah Rs 2,100 ṭheuh pek an ni bawk a, hemi atana sorkarin sum a sen hi cheng vaibelchhe 38.11 a tling a ni. 

Lockdown avanga Megha­laya mi, hmun danga tangkhang mi 9,224 te bank account-ah Rs 3,000 ṭheuh thunsak an ni bawk. 

Open-market sale scheme hnuaia ei tur lak leh supply-na turin food and civil supplies department hnenah Rs vbc 26.38 pek a ni a, Covid-19 dona  kaihhnawiha hma lakna hrang hrangah state sum Rs vbc 69.25 hman a nih thu Sangma chuan a sawi. Health kaihhnawiha sum hman nen hri leng dona atana an sum sen tawh hi cheng vaibelchhe 115.10 a tling tawh a ni, a ti. 

Health infrastructure thuam ṭhatna tur te, quanrantine centre enkawlna leh mipuite chhawmdawlna pekna atan sum hman belh zel a la ngai dawn tih a sawi nghal bawk a ni.