Hmasawnna tluantling petu sorkar kan ni: Gogoi

Assam Chief Minister Tarun Gogoi chuan sorkarin kum 15 chhungin hmasawnna tluantling a thlen tih sawiin, a sorkar chu chi tin, hnam tin thleng phak a nih thu a sawi.

Assembly house-a Larsap thusawi chungchang sawihonaah eptu party thusawi chhangletin, kum 2001 aṭangin Assam sum dehchhuah leh ei leh bar kawngah hmasawnna a awm a, dan leh thupek mumal taka kalpui niin, buaina pawh thunun a ni zel tawh a ti. State chhungah sorkarin muanna a thlen thu a sawi bawk.

Hemi chungchang hi sawibelhin, "Hel pawl tam tak chu inbiakna dawhkan kan kilpui tawh a ni. Pawl dangin min zawm bawk dawn a, hei hian dan leh thupek kenkawh lama sorkar chetṭhat zia a lan tir a ni. Dan leh thupek kenkawhah hlawhchham ni ila engtin nge South Asian Games kan dawn theih ang ni? Ram pawn aṭangin infiammi 3,000 chuang an lo thleng dawn a ni. Rajnath Singh-a pawhin Assam rama dan leh thupek kenkawh a nih dan chu DGP conference ah a fak hial a ni" a ti.

Mimal tin sum lakluh pawh a pung zel a, kum 15 chhung khan a sang zawngin a zuang hial niin CM chuan a sawi. Hnam hrang hrang tan hmasawnna tur sum pawh pek a ni a, eng hnam emaw pawl mahin hnuchhawn an nih thu an sawi lo tih Gogoi chuan a sawilang bawk.

Gogoi chuan sorkar chuan mi zawng zawng huapkim ruahmanna thar a siam a, mi rethei tan pawh a siam a ni, a ti. Assam-in hetiang ruahmanna a neih hi eng state mahin an nei ve lo a, damdawi lama hmasawn nan te, zirna leh hna neilo hna siamsak nan te pawh sorkar chu a inpumpek zel thu a sawi.

Assembly house-a inhnial buai-naah hian AIUDF MLA Abdur Rahim Khan chuan sorkarin hmasawnna nia a puante chu a dik tawklo vek tih a sawi thung.

"Hnam tam takin an pualin Development Council an ngiat a, an duhkhawp ṭanpuina pek loh vang a ni. Eng vangin nge Food Security Act te hi kan mamawh? Retheihna leh hmasawnna ṭhuanawp vang a ni lo em ni" a ti.

Abdur Rahim Khan sawi danin, ruahmanna thar puan hi awm fo mah se a hlawhtlinna tura bawhzuina a awm ngai lo. AGP MLA Keshab Mahanta pawhin sorkar chhinchhiah, hmeichhiate laka hleilenna chungchang sawi langin, Assam ram chhungah hmeichhiate an him tawk lo a ni, a ti.