Governor hian ruahmannate chhunzawm a phal tur a ni : Tuki

Arunachal Pradesh Chief Minister aṭanga chawlhtir tak Nabam Tuki chuan state sorkarin hmasawnna hnathawh tur a kalpui mekte chu tihtawp nilo se a duh thu a sawi.

"Governor JP Rajkhow hian hmasawnna hnathawh tur kalpui mekte chu thliar hranna awm hauh loin kalpui a phal tur a ni. Hmasawnna hnathawh tur tihtawp a nih chuan mipuite rilru a hel mai ang tih a hlauhawm" a ti.

Tuki chuan governor hian inthliarbikna awm hauh loin, mipui zawng zawng tan tan hamṭhatna a thlen tur a ni , a ti. Zawhna chhangin, AP-a sorkar mumal lo buaina thleng zawng zawng chu Governor vang a ni tih sawiin, governor hian thuneihna a duh a, sorkar laipui puihna in Presidents rule pawh puan a ni. Chu-vangin hmasawnna hna thawhte mumal takin a kal-pui tur a ni tih a sawi bawk..

Congress MLA helten congress legislature party hruaitu aṭanga bang tura an duhna chu chhang letin, Supreme Court-a thu kal mek a nih vangin tu sawi theih mah a ni lo tiin Tuki chuan a sawi.

MLA lungawilote thupuangtu Pasang Dorjee chuan Congress MLA 21 te hi Congress party-ah an nghet tih sawiin, an party president Sonia Gandhi leh Vice President Rahul Gandhi te an dodal lo a, Nabam Tuki nunphung leh hnathawh danah an lungawilo mai zawk niin a sawi. Tuki hi hruaitu ber aṭanga paih a nih chauhin kan buaina hi a fel ang, tiin a sawi a ni.

Sorkar laipuiin Pre-sidents Rule-a Arunachal Pradesh a puan vangin Congress chu Supreme Court-ah a zualko a. SC chuan hemi chungchang hi a chhuizui nghal a; AP sorkar chu lehkha pawimawh, chief minister hlui Nabam Tuki, a minister leh parliamentary secretary-te file zawng zawng SC hnena thehlut turin a inbuatsaih mek.