Assam-ah hri kai an pung zel

Assam state-ah Covid-19 kai hmuh chhuah tawh zat chu nimin khan mi 230 an tling. 

State danga tangkhan  haw zingah hri kai hi hmuh chhuah belh zel an nih avangin inkhung hranna dan pawh khauh taka kalpui a nih tur thu health minister Himanta Biswa Sarma chuan a sawi. 

Guwahati-a press conference a neihah, minister chuan tumahin khunghranna dan hi an pumpelh thei dawn lo tih sawiin, tangkhang haw hi an tam avangin green zone aṭanga haw, quarantine centre-a ni sarih an awm hnua test a negative-a te chu an in lamah ni sarih dang inkhung hran chhunzawm phalsak an ni tih a sawi a ni. In lamah inkhung hranna dan hi an zawm ṭha em tih pawh tualchhung thuneituten an enzui reng dawn a ni, a ti. 

Minister chuan nimin thleng khan hmun dang aṭanga motor hmanga haw mi 25,693 leh rel hmanga haw mi 11,724 an awm tawh tih a sawi. Haw tur tam tak an la awm a, mi nuai 12 vel haw tum hi an awm niin a sawi. 

Tangkhang hawte hi quarantine centre-ah khung hran nghal zel an ni a, state sorkar chuan an awmna senso, ei leh in man a tumsak a ni. Ni khatah mi pakhat ei tur pekna atan Rs 500, an riahna manah Rs 2,000 leh mi pakhat zelah allowance Rs 500 a pe a, centre-a ni sarih an awm chhungin mi pakhat tan sorkarin Rs 18,000 zel a seng. Ni sarih hnuah in lamah inkhung hranna atan Rs 2000 ṭheuh a pe leh dawn bawk a, ni 14 chhungin mi pakhat tan Rs 20,000 zel sorkar chuan a seng dawn a ni. 

Sarma chuan quarantine centre-a an awm laia tlanchhuakte chu an laka criminal case siamsak nghal an ni zel dawn tih a sawi bawk.