Assam in Vbc 9,000 a hloh dawn

Nimin khan Assam Assembly chuan sorkar laipuiin state hnena sum a pek dan kalhmang a thlak vangin kum 2015-16 chhungin Assam-in cheng vbc 9,000 zet a hloh phah dawn niin a tarlang.

AGP MLA Phani Bhusan Choudhury zawhna chhangin, state Planning and Development Minister Ajanta Neog chuan "Sorkar laipui thil thlak thleng vang hian Assam in kum 2015-16 chhunga sum a hloh tur chu cheng Vbc 9000 vel a ni" a ti.

Phani Bhusan Choudhury chuan sorkar laipui aṭanga sum hmuh tur chu cheng vbc 4,051.64 aia tlem niin, sum pek dan tih danglam vangin cheng Vbc 2,951 chu state tan phurrit a ni tawh ang, tiin a sawi.

"Kum 2015-16 atana sum ruahman chu cheng Vbc 25,406 a ni a, heng zingah hian cheng vbc 20,127.79 chu sorkar laipui tum tur niin a dang hi state tum tur a ni. Hetih lai hian kumin January thla thleng khan sorkar laipuiin a pekchhuah chu cheng vbc 6357.94 chauh a ni. Sum ruahman zawng zawng hi sorkar kum ral hma ngeia sorkar laipuiin an pechhuak lo a nih chuan, kum tharah chuan an pe chhuak tawh kher lo ang", a ti.

Minister chuan kum 2014-15 khan sorkar laipui chan cheng vbc 17,568.83 aṭangin cheng vbc 12,533.18 zet Assam tan a rawn pe niin a sawi. "NITI Aayog din a nih hnu aṭangin engmah inkaihhruaina mumal a awm lo a, kum 2015 kum kal meka sum ruahman cheng vbc 25,000 lak theih hun hi nghakhlel takin kan thlir a ni. Mahse, hmachhawp tihtawp leh Special Category dinhmun aṭanga thlirin sum dinhmun lamah buaina awm phah a ni", tiin a sawi.