Hlauh nei lo leh mumal zawka hnathawh theih hun a ni: JP Rajkhowa

Arunachal Pradesh Governor JP Rajkhowa chuan commissioner, secretary leh special secretary te ko khawmin, President Rule chu hlauh nei lo leh mumal zawk, induhsakna telloa hnathawh theihna hun ṭha a nih thu a hrilh.

Governor chuan officer te rilru puthmang thlak hun a ni a, pisa hun vawn dik leh inthununna mumal tak kalpui chu an tihtur zinga mi a nih thu a sawi. Governor chuan president rule puan lai leh a hnu lamah sorkar inrelbawlna kawnga thawhhona ṭha tak nei turin officer te chu a ngen. Governor chuan sorkar officer lian tam tak politics thila inhnamhnawih an awm chu pawi a tih thu sawiin, sorkar officer an nih chuan thil danga hlawkna beisei chungin an thawk tur a ni lo a ti. Officer kaisanna chungchangah pawh felhlel a tam hle tih sawiin, department tam zawkah eirukna in bu a khuar nasa hle a ti.

Mahni tana hlawkna tur thil file kalpui a tam hle a, hei hi tihtawp nghal tur a ni tiin Governor chuan a sawi.

Clean Arunachal Campaign hlawhtling taka kalpui a ni chu a fak a, PWD Commissioner hnenah capital complex chhunga leh pawna kalkawng siam ṭha nghal vek turin Rajkhowa chuan a hrilh.

State Infrastructure Development Fund (SIDF) projects hmalakna pawh thlirlet a ni ang a, fund pawh rualkhai takin mipui awm dan te, bial hnufual a nih dan leh mamawhna bik a zirin sem ni rawh se, a ti.

High Level Moni-toring Committee (HLMC) ṭhut-khawm hnuhnung berin 13th Finance Commission an pawm tak pawh kalpui thuai ni se, ngaih-pawimawh hmasak hote chu tidanglam loa kalpui ni se a duh thu a sawi.