PM Modi-an 12th South Asian Games hawng

Prime Minister Narendra Modi chuan nimin tlai khan Guwahati khawpuia Indira Gandhi Athletic Stadium-ah South Asian Games vawi 12-na a hawng. Assam Chief Minister Tarun Gogoi pawh he hunah hian a tel.

SAG hawnna inkhawmah hian lam thiam 1,000 ten thupui thlanchhuah "Development of Sports Through Unity" tih chu thiam takin an pholang. Hawnna inkhawm hi chi hnihin kalpui a ni a; infiamna lam hawi leh hnam ziarang lantirna hun hman a ni. Prime Minister bakah hian South Asia ram hrang hrang sports minister-te an tel a, Maldives Sports minister a remchan loh vangin an defense minister a rawn tel.

Organising Committee CEO Injeti Srinivas chuan South Asian ram- India, Pakistan, Sri Lanka, Bangladesh, Nepal, Maldives, Bhutan leh Afghanistan ṭangin infiammi 3,500 leh anmahni hruaitute an pungkhawm dawn tih a sawi.

SAG ah hian infiamna 23-ah South Asia ramte hi an inel dawn a, Football khelhna tura ruat hmasak Nehru Stadium chu rokhawlhna vangin a hman theihdawn lo a, SAI khelmualah khelh a ni ang.

SAG ah hian venhimna khauh ber hman a ni dawn a, sorkar laipui leh state sorkar-in venhimna kawnga an tihtheih a piang pek an tum.