Papu-Potin, Trans Arunachal Highway peihfel

Arunachal mipuite tana lawmawm tak tur Papu-Potin Section of Trans Arunachal Highway chu siam peihfel tawh a ni a, hawn thuai a ni ang.

Chief Engineer PWD Highway (Western Zone) Bora Ete chuan he kawng sial thar hi endik a ni tawh a, an hnathawh dan a lungawithlak tih a sawi. He kawng siam hna hi TK Engineering ten an thawk a,an thawk ṭha hle tih a sawi.

Chief Engineer chuan "He hna hi a hautak hle a. Harsatna tam tak kan hmachhawn a ni. Mahse, a tawpah chuan ṭha takin zawh a ni ta a. TK Engineer te hnathawh dan a fakawm hle a ni. A hun taka an zo thei hi a lawmawm a ni" a ti.

Chief Engineer chuan he kawng sial hi PM package hnuaia kawng siam zawh hmasak ber a ni a ti. Meka-Shantipur inkar kawng hi siam zawhna a la rei lo a, Papu-Potin kawng km 53 a thui sial hi hlawhtlinna ropui tak a ni a ti. Tualchhung mite thlawpna a pawimawh tih sawiin, kawng sial hi a ṭhat rei a pawimawhzia hria se a duh tih a sawi.

Upper Subansiri leh West Siang district-a kawng sial tur, TAH paltlanga district pahnih chhuntu tur pawh zangnadawmna tihfel ṭep a ni a, bul ṭan thuai a ni ang.

A tirah chuan Papu-Potin kawngpui hi SRK Company sial tura tih a ni. Mahse, buaina neuh neuh a tam vangin TK Engineering in an la chhawng ta zawk a ni. Kum 2013 aṭang khan thawk ṭanin, kum hnih hnuah an zo hman a, " Kan tan chuan hmasawnna ropui tak a ni. PWD hotuten min thawhpui ṭha tak zet a. Tualchhung hruaitute leh mipuiin min thlawp vangin kan lawm hle. Nakin zelah pawh mipuite thawhpuina kan hmuh zel kan beisei" tiin TK Engineer hotute chuan an sawi. He kawng sialna tur sum hi PM package hnuaia SARDP aṭanga hmuh niin, PM hmasa Manmohan Singh-an an state a tlawh ṭuma a pek a ni.