Gas lak awlsam nan Whatsapp group siam

Manipur-a eirawngbawlna Gas sem kawngah rang leh awlsam zawka pek a nih theih nan tunhnai khan Whatsapp Group an siam thar. He whatsapp group-ah hian IOC thuneitute, gas zuar (dealers), semtu leh a phurtu te an tel a ni.

IOC hotute huaihawtin LPG sem kaihhnawiha tel zawng zawng inhmuhkhawmna hi neih niin, IOC te thurawn angin whatsapp group hi siam a ni ta a ni.

Whasapp group kaltlang hian gas phur kal velna, khawiah nge an tan, engvanga tang nge an nih, a semtuten engtikniah nge an sem dawn, gas phurten a ruakin nge a khat an phurh tih te inhrilhkual zung zung nan an hmang tawh ang a, hei hian hun tihkhawtlai leh ṭul loa tha sen a titlem dawn niin thuneitute chuan an sawi.

Free Trade LPG (FPL) scheme hnuaiah, sum dawnna thila hman chi gas bur te, kg 5 chauh thun theih ang chi hman a ni thuai dawn a,tun thla tawp hian sem ṭan theih beisei a ni. Heng gas bur hi a zangkhai dawn a, dawrte leh thingpui dawrah te hman a awlsam dawn a ni. Mahse, hetiang bur te-ah hian subsidy a awm thei dawn lo thung.