Assam-in Muslim survey neih a tum

Assam sorkar chuan state leilung fa zinga Muslim-te dinhmun zir chiang a, socio-economic survey neih a nih tur thu Thawhlehni khan a sawi.

Chief Minister Office chuan survey neih hi Muslim community pangate chawikanna tur a ni tiin, healthcare, cultural identity, education, financial, skill development leh hmeichhiate dinhmun chawikanna kawngahte hma lak tum a ni, a ti.

Chief minister Himanta Biswa Sarma chuan nikum khan indigenous Muslim aiawhte hi meeting a lo neihpui tawh a, hemi hnu hian an harsatna neihte buaipuitu tur sub-committee-te dinin Muslim aiawhte hi an tel ve bawk. Sub-committee te chuan state chhung Muslim community pangate dinhmun zir chianna nei tura socio-economic survey neih hi sorkarah a rawt a, hei hi state cabinet chuan a lo pawm tawh a ni.

Sorkar thiltih tum hi eptu party-te chuan an sel thung a, Congress party chuan thlan bik zinga survey neih tum chu BJP kaihhruai sorkarin inṭhen darhna policy a kalpui tilangtu a ni tiin, survey a nei dawn a nih chuan thlan bik awm loin, mi zawng zawngah kalpui tura an phut thu an sawi.