Sikkim tuilianah mi 14 thi, mi 102 chin hriat lohin bo mek

Sikkim hmar lama ruah leh rial thawk thut avanga Lhonak dila tui liamin Teesta lui a tihlen avanga thi zat chu mi 14 an tling tawh a, mi 102 chu chin hriat lohin an bo mek bawk.

Sikkim sorkar chuan lei 14 a chim thu leh khualzin 3,000 chuang chu state chhunga hmun hrang hrangah chhanchhuah ngai an awm an rin thu a sawi. Hetih lai hian tuilen tirha sipai bo 23 zinga pakhat chu hmuh a ni tawh thung.

Nilaini zing khan Lhonak dil chungah hian ruah leh rial nasa tak thawkin dil tui chu a kuang aṭanga liam khawpin a lian a, Teesta luiah lutin tuilian nasa tak a siam ta a ni. Chungthang tuikhuah pawh a chhe tel nia hriat a ni a, hei vang hian tuilian pawh a nasa zual a ni. Chungthang-a Teesta stage 3 tuikhuah siam mekah hnathawk 14 te chu lei verhah an la tang.

Sorkar senior official-te chuan mitthi hi 10 an hriat chian tawh thu sawiin, mi bo hi 82 an hriat thu an tarlang a,"Lei 14 chim a awm tawh a, pakua te hi Border Roads Organisation enkawl a ni. State sorkar enkawl panga pawh a ṭhen chim leh a ṭhen chhe nasa tak, hman ngam tawh lohte an ni bawk. Khualzin hi mi 3,000 chuang chhanchhuah ngai an awm kan ring," tiin an thuchhuahah an tarlang. Mangan district-a Chungthang bakah, Gangtok district-a Dikchu leh Singtam te, Pakyong district-a Rangpo-ahte hliam leh mibo report hi dawn a ni. Chungthang-ah hian police station chu a chhe bawk niin thuneitute chuan an sawi. Tun dinhmunah tuilianin fibre cable a tihchhiat nasat avangin North Sikkim-ah hian mobile network leh broadband a hman theih rih loh.

Sikkim tuilian tuarte chhanchhuah hna thawh mek zel a ni a, state sorkarin National Disaster Response Force (NDRF) platoon thum tirh luh belh tura a dilna chu sorkar laipui chuan a remti tawh a, NDRF platoon khat hi Rangpo leh Singtam-ah te chhanchhuah hna thawkin an awm mek bawk a ni. State sorkar chuan NDRF platoon khat hi Chungthang-a kal tur an nih thu leh, ei tur bakah mamawh chi hrang hrang a phur tel dawn niin a sawi. State sorkar chuan chhiatna tawh mek kara chhawmdawlna kalpuina atan Singtam, Rangpo, Dikchu leh Adarsh Gaon-ah te relief camp 18 a siam tawh bawk.

Sikkim chief minister Prem Singh Tamang chuan state mipuite chu inralring tur leh, inthlahdah lo turin a chah a,"Sikkim khua leh tui zawng zawngte inpeih renga awm turin ka chah duh che u a, ṭul tawpah lo chuan zin chhuak lo hram ang che u. Rilru fim tak pu reng thei dinhmuna kan din a ṭul lai a ni a, boruak a ṭhat leh thuai pawh kan beisei tlat a ni," a ti.

Pakyong airport dinhmun a derthawng

Sikkim-a airport awmchhun, Pakyong Greenfield airport bang pawh ruah sur rei avangin chim mai hlauhawmah a ding niin Sikkim mite chuan an sawi. Ni eng emaw ti chhung chu airport bang hi ruahin a nan tawh avangin a awn deuh tawh a, Thawhlehni zana tuilian avang khan a zual niin an sawi.

Airport thuneitute hi biakpawh theih an ni rih lo a, helai vela chengte erawh chuan airport bang hi a chim a nih chuan Kalimpong tlang kaltlanga Sikkim leh West Bengal pawhtu, airport awmna tlang hnuai lama khua, Challamthang, Pacheykhani leh Rorathang-te chu a dan pin mai an hlau a ni.