Manipur : Chief Secretary leh expert committee-in Kangpokpi tlawh

Manipur chief secretary Dr. Vineet Joshi leh Supreme Court-in a ruat, member pathum awmna expert committee chuan Nilaini khan Kangpokpi district an tlawh.

Expert committee hi Jammu and Kashmir High Court chief justice hlui, Gitta Mittal chuan a ho a, member-te chu Bombay High Court judge hlui Sahlini Phansalkar Joshi leh Delhi High Court judge hlui Asha Menon-te an ni. Supreme Court hian Manipur tualchhung buaina thleng chungchangah, harsatna tawkte dinhmun zir chiang a, an indinthar lehna tura hmalak dan tur ngaihtuah turin he committee hi a din a ni.

Committee member-te hi district deputy commissioner, Mahesh Chaudhari leh official dangte chuan Deputy Commissioner Office complex-ah an lo dawngsawng a ni. District official-te nen an district dinhmunte sawihoin meeting an nei nghal bawk.

Relief centre atana hman mek, Keithelmanbi High School leh DIET Centre, Leikop-a mite chu expert committee hi an tlawh a, heng hmuna khawsate nen inkawmna hun an neih bakah an mamawh thil hrang hrangte an sem nghal bawk. Centre pahnihah hian mi 500 chuang ve ve an khawsa mek a ni.

Buaina chhuak avanga in leh lo chan puala state sorkarin in a sak-sak tur, Keithelmanbi-a fabricated house 150 chuang awmna tur sak mek chu team hian an en dik bawk.