Tripura : Naupang pawngsual leh thattu mi 2 thi tura hremna pe

North Tripura-a special POCSO (Protection of Children from Sexual Offences) court chuan hmeichhe naupang, kum tling lo pawngsual leh thattua puh mi pahnihte chu thi turin an chungthu a relsak.

Pawi khawihtu mi pahnihte hi POCSO Act hnuaia section 6 bakah, Indian Penal Code section 376D leh 302 hmangtea man an ni. Special court judge Angshuman Debbarma chuan thuhretu mi 41 te thusawi aṭang leh police-te'n finfiahna an theh luh aṭangin thutlukna hi a siam a ni.

Khaihlum tura tih takte hi Sourabh Chandra Nath (19) leh Dibakar Das (20) te an ni a, June 17, 2019 khan hmeichhe naupang kum ruk mi pawngsualin, an that zui a ni. Hmeichhe naupang nu hi thiam loh chantir, Sourabh Chandra Nath te chhungkaw hnuaia thawk a ni.