Sikkim tuilian avanga nunna chan mi 56 tling tawh, mi 141 bo

Sikkim hmar lama ruah leh rial nasa tak thawkin Lhonak dil tiliam a, Teesta lui lian avanga nunna chan chu mi 56 an tling tawh a, hriat theih chinah mi bo hi mi 141 an awm bawk niin Sikkim State Disaster Management Authority chuan an sawi.

Nunna chan mi 56 zinga mi 27 te ruang hi hmuh tawh a ni a, mi 26 te chu hliam avangin damdawi inah enkawl tura dah an ni thung. Sikkim tuilian avang hian district hrang hrang palia mihring 25,065 te chuan harsatna tawkin, in 1,203 a chhe bawk a ni. Tun dinhmunah chhanchhuah hna thawktute chuan mi 2,413 an chhanchhuah tawh thu an sawi a, tuilian avanga chenna nei lo mi 6,875 te tan relief camp 22 buatsaih a ni bawk niin state sorkar chuan a sawi a ni.

Sipai bo zinga 8 ruang hmu tawh

Tulianin a lak, sipai 23 zinga mi pariatte chu an ruang hmuh a nih tawh thu sawiin, mi 14 te chu an la zawng chhunzawm zel dawn niin defence minister Rajnath Singh chuan a sawi.

Rajnath Singh chuan nunna hlu tak chan a nih avanga a tawrhpuina thu sawiin, sipai zinga nunna chan an awm chu pawi a tih thu a sawi a,"Ram tana hnathawka dah an nihna hmuna an inpekna avangin theihnghilh an ni tawh lo ang. Sipai bo 23 zinga pakhat chu nung dama hmuh a ni a, mi pariat erawh nung damin kan chhan thei ta lo a ni," tiin X-ah a post a ni. Minister chuan an la hmuh loh mi 14 dangte chu nasa zawka zawn zel an nih tur thu a sawi bawk.