Manipur : Phalna nei loa district leh institution hming thlak hrem theih

Manipur sorkar chuan thuchhuah siamin, phalna nei loa district leh institution hming thlak chu hrem theih a nih thu sawiin, mipuite chu chutiang thil ti lo turin a chah. Phalna nei loa chutiang lo tih chu hnam leh hnam inkara buaina chhuak avanga state chhunga boruak chhe sa tizual thei thil a ni, a ti.

Manipur chief secretary, Vineet Joshi chuan,"Mi tu mahin district hming emaw, sub-division, hmun, institution leh institution address pawh sorkar aṭanga phalna hmu lo chuan a thlak tur a ni lo. State sorkar chuan mi tu te'n emaw awmze nei tak leh tum nei ranin district hming thlak an tum niin a hria a, hei hian hnam leh hnam inkara buaina chhuak mekah boruak a tichhe zual thei dawn a ni. Hemi chungchang hi sorkar chuan a ngaihven reng a, boruak muanawm nei leh thei tur leh, inlungrualna tichhe thei zawnga hmalakna, thupek zawm lo chu dan anga hrem an ni zel dawn a ni," tiin thuchhuahah hian a tarlang.

Manipur-ah hian May thla tira Tribal Solidarity March neih a nih aṭanga hnam pahnih inkara buaina a chhuah aṭang khan boruak ṭha a la awm thei lo a, mi 180-in nunna an chan tawh a ni.