AP-ah cancer hospital din dawn

Arunachal Pradesh health minister Alo Libang chuan St. Claret auditorium-a '3-Day Cancer Detection and Awareness Camp' neihnaah Arunachal Pradesh tana cancer enkawlna tur bik, cancer hospital din a nih tur thu a sawi.

Libang chuan thawktu mamawh leh hmanraw ṭha ber ber hmanga thuam tur cancer hospital siamna tur atan hmalakna a kal ṭan tawh niin a sawi a, cancer hospital chuan Arunachal Pradesh chu cancer free state ni turin a pui thei dawn a ni tiin, awareness camp chu cancer tamna hmun, Papum Pare leh Pasighat ah te pawh neih ṭul a tih thu a sawi.

3-Day Cancer Detection and Awareness Camp hi Arunachal Pradesh state cancer society bakah Guwahati-a Dr. B. Borooah Cancer institute leh Northeast-a Council of Baptist Church te ṭangkawp buatsaih a ni a, Ziro district health society leh Lower Subansiri district thuneitute pawhin an pui bawk a ni. Libang hian Tani Supun Dukung te ngenna ngaipawimawhin, Gyati Takka General hospital-a khum 10 awmna cancer hospital din chu a thlawp thu a sawi a, health department-in specialized mobile van pahnih a pek chhuahte chu chu lai hmuna cancer avanga damlote phur tur bik a nih thu a sawi bawk.