Air Force-te'n Sikkim-ah chhawmdawl hna an thawk

Teesta lui lian avanga chhiatna hrang hrang a thlen hnuah Indian Air Force (IAF) te chuan Sikkim-a harsatna tawkte ṭanpui leh chhanchhuah hna an thawk ṭan niin Defence official-te chuan an puang.

IAF chuan tuilian avanga harsatna tawkte ṭanpuina leh chhawmdawl hna hi Air Force station, Bagdogra aṭangin an kalpui niin an sawi. Khualzin tangkhangte phur chhuak turin helicopter a inpeih reng thu leh Sikkim mi, tuilian avanga tangte pawh hmun him lama sawn turin an thawk dawn niin an sawi bawk.

Air Force-te hian Garud commando bakah, inbiakpawhna hmanrua te, tuialhthei leh damdawi bakah bo zawn leh chhanchhuah hna thawk tura Chinook leh MI 17 V5 helicopter-te Sikkim-ah hian tirh luh a nih tawh thu an sawi. Chhanchhuah hna thawhna kawngah hian Eastern Air Command chuan a kaihruai a ni.

Tun dinhmunah sipai pakuate ruang tiamin ruang 34 chhar tawh a ni a, tuilenna hnuhma, chirh leh thil chhe hnuaiahte ruang hi a awm ṭhin avangin hmuh kim a la har thu thuneitute chuan an sawi a, bo meka an hriat mi 105 te erawh an la zawng chhunzawm zel a ni.

West Bengal-a Jalpaiguri district thuneitute chuan Bengal-a Teesta lui luan thlakna lamah ruang 40 chhar a nih tawh thu an sawi ve bawk. Sikkim State Disaster Management Authority (SDMA) chuan Sikkim leh Teesta luan luhna, West Bengal thuneitute chu inbe reng mah se, an ruang hmuh leh chhar zat hi a inan loh theih thu an sawi.