Adivasi hel inpe 1,182-te'n ṭanpuina dawng

Assam sorkar chuan Adivasi hel, sorkar kuta inpe mi 1,182 te hnenah Pathianni khan an dinhmun siamna atan leh lei rem an rah theih nan ṭanpuina Rs. nuai 4 ṭheuh fixed deposit-a dahsakin a pe. Heng hel pawl panga aṭanga bang ta mi 1,182 te hi July 6, 2023 khan Assam sorkar hnenah an ralthuam nen an inpe a ni.

Hel pawla tel ṭhin mi 1,182 te hi Adivasi Cobra Military of assam (ACMA), All Adivasi National Liberation Army (AANLA), Birsa Commando Force (BCF), Santhal Tiger Force (STF) leh Adivasi People's Army (APA) aṭanga bangte an ni hlawm a ni. Heng mi 1,182 te hnenah hian Assam chief minister Himanta Biswa Sarma chuan an account-a fixed deposit-a pawisa dahna certificate hi Guwahati-a Srimanta Sankardev Kalakshetra hun hmannaah a hlan.

Thuneitute chuan Rs. nuai 4 pek an nih bakah hian heng hel inpete hian sorkar laipui hnuaia hel aṭanga bangte dinhmun siam remna tur atana duan, special scheme hmangin kum thum chhung chu thla tin Rs. 6,000 an dawng dawn niin an sawi bawk. Bul ṭanna tur atana an mamawh tur skill development training pawh an nei dawn niin thuneitute chuan an sawi.