Assam-in high speed corridor siamna tur pawm

Assam cabinet chuan km 1,000-a sei, 'High-Speed Economic Corrridor' kawngpui, Rs. vbc 3,000 senga sakna tur a pawm.

Thawhṭannia chief minister Himanta Biswa Sarma kaihhruai cabinet meeting ṭhu khawm thuchhuak hi Assam tourism minister, Jayanta Malla Baruah chuan sawiin, high-speed corridor chu Asom Mala project hnuaia siam a nih tur thu a sawi. Cabinet hian Kaziranga-a Judicial Guest house sakna tur pawh a pawm bawk.

Baruah chuan Judicial guest house sakna tur atan hian Bokakhat revenue circle hnuaia Kaziranga Mouza hmun, Halowagaon revenue khuaa ram Bigha 7, Katha 2 leh Lessa 10 chu ruahman a nih thu sawiin, guest house sak tur chuan tourism sector a tihchangtlun dawn bakah, state mikhual leh Gauhati high court mikhualte tan thlen in changtlung leh changkang tak a nih theih dawn thu a sawi.

Heng bakah hian cabinet hian Commissioner of Taxes building thar sak zawhna tur atana additional estimate siam ṭhat leh pawh an pawm bawk a, Bherjan-Borajan-Padumoni wildlife Sanctuary-a hmun derthawng lai siam ṭhatna turin Sipajhar Municipal Board hnena fund pek a remti bawk a ni. Assam sorkar chuan NABARD hnen aṭangin thingtlang khaw 90 kawng leh lei 4 siam ṭhatna turin Rs. vbc 950.43 a puk dawn thu cabinet meeting thuchhuak chuan a tarlang bawk.