Meghalaya-ah zirlai 10 nei tling sikul 269 awm

Meghalaya education minister, Rakkam A Sangma chuan a Ministry-in survey a neih aṭanga a lan danin, an state chhunga zirlai 10 nei tling lo primary sikul 168 an awm. Upper primary sikul 101 pawhin zirlai naupang inziak lut hi 10 an nei tling lo bawk a ni.

Sangma chuan ministry data chu state sorkarah thlen a nih tur thu leh, endik a nih hnua a ṭul anga hmalak chhunzawm an tum thu a sawi. Sikul khar chu an harsatna tihkiamna tur a nih loh thu a sawi a, mahse, a ṭul chuan sikul ṭhenkhat chu khar mai a pawi lo zawk thei niin a sawi bawk."Thuneitute'n sikul zawng zawng hi an tlawh phawt ang a, report kan dawn hi han fiah phawt se la kan hmalak zel dan tur chu a sawi theih chauh ang. Education department hian naupang sikul kal an tlem chhan leh in-admit an tlem chhan hi hriat phawt kan tum dawn a, sikul hmunhmain a zir lo nge, zirtirtu ṭhat loh vang nge thil dang vang tih hi hriat kan tum dawn a ni," a ti.

Sikul ṭhenkhat fin mai tumna a awm em tih zawhna chu Sangma chuan, sikul ṭhenkhat chu hmun kilkhawr leh hla tak takah te awm a nih hlawm avangin thil awlsam tak a nih loh thu a sawi a,"Sikul ṭhenkhat chu tlang chhipa awmte a awm a, kilometre 5 aṭanga kilometre 10-a hlaa awmte an ni hlawm a, zirlai tan chutianga ni tin kal chu a harsat phah hle dawn a ni," tiin a sawi bawk.