Assam CM-in Ahom General Bir Lachit Barphukan lim tlangzarh

Assam chief minister, Himanta Biswa Sarma chuan Thawhṭanni khan Narangi Military Station-a Bir Lachit Barphukan Park-ah Ahom General Bir Lachit Barphukan leh Saheed Smarak lim a tlangzarh. Saheed Smarak hi Martyrs' Memorial tia hriat bawk a ni a, August 1942-a Quit India movement kalpui a nih laia ṭhalai mipa pasarih thi tate lim a ni.

Lim tlangzarhna hun hi Assam ropuina leh sulhnu neih ṭhat tak takte lawmna hun atana hman a ni a, Ahom Dynasty tana Ahom General Bir Lachit Barphukan-a hnathawh leh thiltihte sawi chhuah a ni bawk. Saheed Smarak lim tlangzarh a nih rual hian ram tana an nunna hlantu, Assam sipai huaisen tak takte zahna leh chawisanna atana din a nih thu an sawi a ni. He hunah hian Assam State Cultural Department chuan General Bir Lachit Barphukan-a nun entirna drama an chang bawk.

Assam tana thawhhlawk tak takte lim tlangzarhna hunah hian Lieutenant General RP Kalita, PVSM, UYSM, AVSM, SM, VSM, General Officer Commanding-in-Chief, Eastern Command, Lieutenant General Sanjay Malik, General Officer Commanding 101 Area, Major General PS Joshi, General Officer Commanding 51 Sub Area, Major General RK Jha, AVSM (Retd), historian, Armed Forces personnel, leh NCC cadet te an tel bawk a ni.