AP-ah Namdapha Butterfly Festival hmang dawn

Arunachal Pradesh chuan October 13-15 chhung hian Namdapha Butterfly Festival a huaihawt dawn a, nungcha humhalhna leh venhimna lam ngaina mite hipna tur atana buatsaih a ni.

He festival hi Miao-a awm, Namdapha National Park & Tiger Reserve te'n Changlang district thuneitute leh Society for Education & Environmental Development (SEED) te nena ṭangkawpa an buatsaih a ni.

Festival hi Namdapha National Park & Tiger Reserve chhunga buatsaih tum a ni a, helai hmuna cheng phengphehlep chi hrang hrang leh an mawinate ngaihhlutna tur atana buatsaih a ni. Ni thum chhung hman tur a ni dawn a, khuarel mawina hmuhtir leh thil siam hlutna inzirtir a, mihringte nena inzawmtir chu he festival tum pakhat a ni bawk.

Deputy chief minister Chowna Mein chuan festival neih tur chu a phur thu sawiin,"He festival hian NamdaphaTR-a phengphehlep chi hrang tamzia leh mawizia hi lantir a duh a, thil siam dangte ngainaa humhalh duhtute tan chuan tel loh phal chi a ni lo. State dang 16 aṭanga lo tel turte pawh ka lo lawm che u a, rilru inang khat pu inhmu khawm tur tan tun hi hun ṭha a ni. Khuarel mawina leh hlutna inzirtir hi kan thlah lo la awm turte tan uar deuh deuh ang u," tiin X-ah a post.

Namdapha National Park hi Arunachal Pradesh hmarchhak lama Changlang district chhunga Miao-ah awmin, thil nung chi hrang hrang a tam hle. Ramngaw chhah ṭha tak niin ramsa vang tak tak bakah mang mai hlauhawm ramsa dangte pawh an awm a, phengphehlep hi chi hrang 300 chuang a awm a ni.