Mimal ram tlanchhiatsan chungchangah Manipur sorkarin hriattirna a chhuah

Manipur-a tualchhung buaina chhuak avanga mi tam takin an in leh lo an tlanchhiatsan hmuna hmalakna awm chungchangah, Supreme Court (SC) chuan Manipur sorkar chu mimal ram tlanchhiatsante venghim tur leh, in tihchhiat emaw, bungraw tihchhiatte pawh tumahin an lak, khawih leh tihcingpen lohna tura hma la turin a hriattir a, court thupek hi Manipur sorkar chuan an bawhzui nghal thuin a chhang.

Manipur-a tribal leh Meitei hnam inkara buaina a chhuah hnuah mi 70,000 velin an in leh lo tlanchhiatsanin, sikul, sorkar building leh auditorium-a camp siamah an khawsa mek a ni. Hetih lai hian mi ṭhenkhatin an in leh ram tlanchhiatsan hmunahte mimal leh Manipur sorkarin kutthlak a, hma lo laa puhin Supreme Court-ah petition an theh lut a ni. Hemi chungchang hi Supreme Court chuan a ngaihtuah hnuah Manipur sorkar chu mimal ram leh in, bungruate venghim turin a hriattir.

Manipur sorkar chuan Thawhlehni khan thuchhuah siamin mipuite chu mimal ram tlanchhiatsana engmah ti lo turin hriattirna a chhuah a, chutiang mimal rama kutthlakna a awm chuan boruak a tichhe zual thei niin an sawi.

Manipur Commissioner (Home), T Ranjit Singh chuan Supreme Court-in petition theh luh a ngaihtuahna aṭangin Manipur sorkar hnena hriattirna a chhuah thu hi a sawi. SC chuan,"Manipur sorkar hian raltlante'n an tlanchhiatsan ram leh an in bakah an bungruate chu engtin mah khawih leh tihdanglam loh tur a nih angin a venghim tur a ni. Hetiang tilui chu hnawh chhuah emaw court thupek hnial anga ngaiin thubuai siamsak theih a ni ang," tiin a tarlang.

Commissioner hian DC leh SP te zawng zawng chu SC thupek kengkawh tur hian hriattir an ni tawh tih a sawi. "Mimal emaw, pawl emaw, court thuchhuak zawm lo apiang chu hemi hunlaia dan siamin a phal leh huam chin ang zelin hrem theih an ni ang a, court zah lohna thubuai siamsak theih an ni bawk ang," tiin state sorkar thuchhuahah chuan an tarlang bawk.