Sikkim : IAF-in khualzin tangkhangte phur chhuak

Sikkim tuilian avanga khualzin tangkhangte chhanchuah hna chu Indian Air Force (IAF) chuan Thawhṭanni aṭang khan a thawk ṭan a, nimin thleng khan Lachen leh Lachung khaw pahnih aṭangin khualzin 690 an chhanchhuah tawh thu leh, heng zinga 26 te chu ram dang mi an nih thu an sawi.

Chief secretary, VB Pathak chuan Thawhlehni khan IAF-te'n khualzin 176 an hruai chhuah belh leh tih sawiin, heti hian IAF-te'n thlawhna hmanga an chhan leh phurh chhuah hi mi 690 an tling tawh a, an vai hian Lachen leh Lachung khua vela tangkhangte vek an ni. IAF te hian chhanchhuah hna thawk tur hian helicopter pasarih an tir a, heng zinga pali hi khualzinte Paykong airport-a hruai tura ruahman a ni. IAF helicopter-te hian khualzin tangkhangte chhanchhuah hna a thawh bakah hian Sikkim hmar lam mipuite tana chhawmdawlna thil ton 58 dawn a thlen tawh bawk a, helai hmuna sipai leh ITBP te mamawh pawh a phur bawk a ni.

Khualzin bakah hian khawtual mi chhanchhuah tawh zinga 499 te chu lirthei hmangin Sikkim hmar lam aṭang hian Mangan lamah hruai an ni a, heta ṭang hian a tam zawk chuan sumdawng lirthei hmangtein Gangtok an pan leh hlawm a ni. Sikkim hmar lam aṭang hian mi 1,200 chuang lak chhuah an ni tawh. Hetih lai hian tangkhang dangte pawh nimin khan eng emaw zat chhanchhuah leh an ni bawk.

Ruah leh rial thawk thut avanga Teesta tuilian hian Sikkim-a mi 87,300 lai a nghawng a, kar khat zet a liam hnuah pawh mi 476 te chin hriat lohin an la awm. Sikkim-ah hian ruang 36 hmuh tawh niin, lui luan thlakna leh hmun dangah ruang 41 hmuh a ni tawh bawk a ni.