Manipur Congress MLA parukin banna thehlut

Manipur-a Congress MLA paruk chuan Legislative Assem­bly member an nihna aṭanga banna an thehlut a, Congress party pawh an chhuahsan nghal bawk. 

Speaker Yumman Khem­chand Singh hnena banna thehlut eptu MLA parukte hi Thawhṭanni zana chief minister N Biren Singh kaihhruai, BJP sorkar fiah a nih ṭuma tel duh lote an ni. Sorkar fiah a nih dawn vang hian Congress chuan an party MLA te chu special session-a tel vek tur hian hriattir mah se, anni ho hi an tel duh lo a ni. 

MLA an nihna aṭanga banna an thehluh hnuah, Congress party office-ah banna lehkha hi an thehluh nghal bawk tih Manipur Pradesh Congress Committe general secretary, Hareshwar Goshwami chuan a sawi. Speaker chuan MLA paruk zinga panga, Wangkhei MLAO­kram Henry, Saitu MLA Ngamthang Haokip, Wangoi MLA Oinam Lukhoi, Singhat MLA Ginsuanhau leh Lilong MLA Md Abdul Nasir-te banna chu a pawmsak a, mahse Wangjin Tentha MLA Paonam Brojen Singh chu Tribunal-ah disqualification case ngaihtuah lai a nih avangin a pawmsak ve rih lo. 

Banna thehlut Congress MLA-te chuan an state-a Congress hruaitu O Ibobi Singh chu an ring zo tawh lo tih sawiin, amah avang hian Assembly-a party  mala seat ngah ber, Cong­ress hian sorkar a siam thei lo niin an sawi a ni.