Assam-a hri kai dam tawh zingah Plasma thawh mi 300 chuang awm

Assam-ah Covid-19 kai dam tawh mi 300 chuangin  hri kai mekte enkawlna atan an plasma an thawh tawh. An zingah hian doctor, nurse leh health worker eng emaw zat an tel. 

State sorkar chuan hri kaite enkawlna atana plasma thawh tura sawmin, he hmalakna hi district tinah kalpui a tum a ni. Health department chuan Guwahati-a hemi puala programme siamah plasma thawhtute hnenah hian certificate leh letter of appreciation a hlan a ni. Health minister Himanta Biswa Sarma chuan donor-te hi sorkar scheme hrang hrangah duhsak an ni dawn tih sawiin,  PM Awas Yojana hnuaia an awmna tur in pawh an thlang thei dawn a ni, a ti.

Hri kai 64,406 an awm 

Assam-a Covid-19 kai hmuh chhuah hi nimin thleng khan mi 64,406 an tling tawh. Thawhlehni khan hri kai hmuh chhuah thar 2,669 awmin, an zinga 399 chu Guwahati khawpuia mi an ni. Hri kai hmuh tawh zingah 43,586 chu an dam tawh a, kai mek hi mi 20,662 an la awm. Mi 155 in an thihpui tawh bawk. Health minister chuan nimin aṭang khan ni khatah Covid-19 test hi nuai  khat zel neih theih an tum tih a sawi