AP CM-in Covid Hospital endik
Arunachal Pradesh chief minister Pema Khandu chuan Thawhlehni khan Chimpu-a MLA apartment-a TomoRiba Institute of Health & Medical Science (TRIHMS)-a Covid Hospital siam a tlawh.
Khandu hi Assembly speaker PD Sona, deputy chief minister Chowna Mein leh health minister Alo Libang-ten an ṭawiawm. CM chuan hospital-a doctor, health official leh staff-te kawmin, kar hnih chhunga Covid Hospital siam peih hman tura an thawhna leh inpekna avangin lawmthu a hrilh.
Covid-19 veite enkawlna turin hospital siam a nih chu a lawmawm a tih thu a sawi rualin, CM chuan dam lo enkawl ngai an tam chhoh zel loh a beisei thu a sawi bawk. Covid Hospital-ah hian ICU khum 10, khum 16 ve ve awmna male ward leh female ward te siam a ni a, Operation Theater, Labour Room, Neonatal ICU, Dialysis Unit, X Ray, Ultra-Sound leh Laboratory-te siam nghal vek a ni. Hospital pum hi damdawi hmanga kah thianghlim a ni, hemi hnu hian TRIHMS-a Covid-19 kai enkawl mek te, taksa lama harsatna neite chu sawn an ni dawn a ni.
AP-ah hian Covid-19 kai hmuh chhuah 2,327 an awm tawh. Nimin khan hri kai hmuh thar 96 an awm leh a, an zingah hian security force mi leh sa 61 an tel a ni. August 1 aṭang khan AP-ah hian security force zingah hri kai hmuh chhuah 383 an awm tawh. Hri kai hmuh zinga a tam zawk chu enkawl dam an ni tawh a, enkawl mek mi 690 an awm a, mi pathumin an thihpui tawh bawk a ni.