Manipur : Tharum thawhna video leh thlalak social media-a theh darh khap

Manipur sorkar chuan tualchhung buaina avanga Manipur dinhmun a chhiat zual lohna tur atan, social media-ah tharum thawhna lam rawng kai thlalak leh video theh darh khap a nih thu a puang.

State sorkar chuan thlalak leh video theh darh chu mi ṭhenkhatin thinrima mipui pun khawmtirna hmanrua atana hmang an awm thu sawiin, hei hian state chhunga remna leh muanna siamna tur kawng a tihchhiat theih thu a sawi.

May thlaa Manipur-a tualchhung buaina a chhuah hnuah hun rei tak chhung mobile internet tihtawp a nih hnuah rei lote hawn a ni a, hemi chhung hian buaina chhuah laia thlalak leh video darh avangin buaina a punlun leh nia sawi a ni. Hei vang hian sorkar chuan thupek hi a siam thar leh ta a ni. Sorkar thupek bawhchhiate chu hriatthiamna tel loa man leh hrem an nih tur thu an tarlang a, tilui an awm a nih chuan Information Technology Act leh IPC hnuaiahte man leh hrem theih an nih thu an tarang bawk.

Manipur Home Department chuan,"State sorkar chuan uluk taka a ngaihtuah hnuah Manipur-in dinhmun ngai awh leh vat theihna atan hetiang khapna thupek siam hi ṭha a ti ta a ni," tiin, state chhung mite chu tharum thawhna leh buaina chawk chhuak thei hawi thlak, video eng chi mah thawn darh phalsak an nih loh thu a sawi. Hetiang lam hawi kawlte chu Superintendent of Police hnai berah hriattir a, pe turin an chah bawk a ni.