Assam-in kawngpui him leh him loh endikna tur siam dawn

Assam State Transport Corporation/Transport department leh M/s ITEUVE INDIA Pvt. Ltd. te ṭangkawp chuan, M/s Applus+ITEUVE TECHNOLOGY S.L.U thawhpuiin, Assam-a district pali; Tinsukia, Biswanath, Jorhat leh North Salmara-ah kawngpui him leh him loh endikna tur, Automated Testing Station (ATS) an siam dawn.

ATS-te hi Public Private Partnership (PPP) hmanga siam leh Built, Own Operate and Transfer (BOOT) anga siam tur a ni. Assam transport minister Parimal Suklabaidya chuan,"Hetiang hmalakna hi India rama a hmasa ber a ni a, Assam tana hma hun him leh felfai zawk neih theih beiseia ti kan ni. Kawngpuia accident tam tak ven bakah kawngpui him dan chin hriatte, lirthei pakhatin boruak bawlhhlawh a siam tam zawng thlengin kan hre thei dawn a ni," tiin a sawi. ATS tum ber chu mihring inrawlh tam ngai lo tura khawl hmanga lirthei fitness test theihna neih a nih bakah, kawngpui a lo him a, accident thleng ṭhin tihtlem a ni.

Assam State Transport Corporation (ASTC) managing director, Rahul Chandra Das pawhin,"Lirthei himna tur atana dan zam aṭanga tehin, lirtheite chu kawngpuia tlan tlak a ni em tihte ATS hian a teh thei dawn a ni. Hetiang ti thei khawl hi khawvel huap pawha an hman leh ram tam taka an rin ber a ni a, khawi lai emaw chiang lo avanga motor accident tihtlem nan a ṭhat bakah, lirtheite fit ṭha reng tura nawr nan a ṭangkai hle a ni,"a ti.

ATS bunna atan hian ASTC leh transport department bakah Assam sorkar chuan ram an pe a, private firm-te'n a siam leh enkawl hna an thawk thung dawn a ni. Das chuan ASTC hmalakna chu fakawm a tih thu leh, ASTC chuan hmasawnna lam a pan mek a, tuna ATS siam tur pawh hian Assam-a hmasawnna nasa tak a rawn thlen a beisei thu a sawi bawk.