Tipra Motha-in mass rally huaihawt dawn Meghalaya CM Sangma'n a telpui dawn

Tripura-a eptu pawl lian ber, Tipra Motha chuan Inrinni hian Tripura Tribal Areas Autonomous District Council (TTAADC) headquarters, Khumulwng-ah rally lian tham tak a huaihawt dawn.

Tipra Motha chairman hlui leh lal chhungkhaw thlah, Prayot Kishore Manikya Debbarma chuan Tiprasa community chuan an dikna chanvo nei turin na takin an bei zel dawn tih a sawi a, Khumulwng-a rally neih turah hian tel vek turin mipuite a sawm.

Debbarma chuan October 14-a rally neih tur hi Meghalaya chief minister Conrad Sangma leh a cabinet member ṭhenkhatte'n an telpui dawn tih a sawi bawk. Ani bakah regional party hrang hrang hruaitute pawhin an telpui dawn niin a sawi.

Tipra Motha hian Tripura leilung fa, tribal hnamte chennaah state hran, Greater Tipraland din an phut a ni. September 30 khan an thil phut nawrna atan TTAADC area-ah darkar 12 awh nawrh an lo huaihawt tawh bawk. Debbarma chuan mass rally an huaihawt tur hi state hran din an phut nawrna bakah, state chhunga tribal-te harsatna hrang hrang tawhte chinfel dan ngaihtuahpui tura sorkar laipui nawrna tur a nih thu a sawi.

Tipra dintu, Debbarma hi party chairperson a nihna aṭangin bang tawh mah se, party-a thuneitu sang, policy-making body member-ah a la awm zui reng tho a ni.