Manipur : Assam Rifle-te'n ralthuam thuhruk tam tak man

Assam Rifles leh Border Security Force (BSF) ṭangkawp chuan Gothal-Phoulijang, Churachandpur-ah Ningani khan ralthuam chi hrang hrang leh silai mu ṭhahnem tak, thuhruk ni ngeia hriat an man thu an puang. Ralthuam thuhruk man tur hian thu rintlak tak an dawn thu an sawi.

Kohima PRO Defence chuan Indian Army hnuaia Red Shield Division te ṭanpuina zarah ralthuam ṭhahnem tak thuhrukna an hmuhchhuah thu sawiin, ralthuam an man zingah hian 9mm carbine silai, tear gas silai, mortar siam danglam, silai mu ṭhahnem tak te a tel a ni. Ralthuam an mante hi chhui zui turin Churachandpur police station-ah an hlan.

Assam Rifles leh BSF te'n ralthuam thuhruk zawn pah hian medical camp an buatsaih bakah, Gothal-Phoulijang khuaah hian mipui mamawh thilte an sem bawk. Hetih lai hian Indian Army-te pawhin West Imphal district-a P Moulding khuaah medical camp an lo buatsaih ve bawk a ni.

Manipur police control room chuan ralthuam dap hna hi joint security force-te hian Bihnupur, Kakching, Churachandpur leh Thoubal district-ahte an nei tih a sawi.