Meghalaya-ah rehabilitation centre 10 din belh dawn

Meghalaya Social Welfare Department chuan sorkar laipui nen ṭangkawpin, nakkum March ral hmaa rehabilitation centre leh de-addiction centre 10 din belh an tum thu an puang. Meghalaya hian rehabilitation cnetre hi 11 an nei sa mek a ni.

Social welfare minister Paul Lyngdoh chuan Shillong All Faiths Forum (SAFF) hotute chu a office-a kawmin, meeting-ah hian ruihhlo hman sual avanga ṭhalaite nunna derthawnga a awm dan te, nasa zawka inzirtirna neih a nih theih nana sakhaw pawl hrang hrangte puihna leh thawhhopui dan turte an sawiho a ni.

Meeting-ah hian December ni 5 aṭanga ṭan turin tihtur hrang hrang ruahmanna an siam a, zirlaite zinga seminar leh awareness buatsaih a, heng programme-ah te hian social welfare aṭang leh police leh sakhaw hruaitute aṭanga resource person neih ṭhin turin an rel a ni.

State sorkarin SAFF nena ṭangkawpa Shillong pawn lam thlenga inzirtirna a kalpui dan tur an rel a, ruihhlo avanga khawtlangin harsatna a tawh ṭhin chu mipuite nena thawhhona ṭha a awm loh chuan do hneh a har dawn niin an sawi.

SAFF aṭanga member kalte hian ruihhlo do kawnga sorkar tha tichak tur leh ṭanpui tura theihtawp chhuah an tum thu an sawi a, SAFF secretary, Robert Majaw chuan ruahmanna felfai tak siam chunga seminar leh awareness programme buatsaiha sikul naupang tam zawk an tel theihna tur kawngte pawh SAFF chuan an lo ngaihtuah tur thu meeting-ah hian a sawi a ni.