Union Health Minister-in Imphal-ah Project Sunrise hawng

Union Health Minister Jagat Prakash Nadda chuan kar kalta Inrinni khan City Convention Centre, Imphal-ah hmarchhak state te tana duan, HIV veite enkawlna tihchangtlunna tur 'Project Sunrise' a hawng.

He project-in a tum ber chu hmarchhak state-a HIV hluar zel tur beihlet a ni a, damdawi hmanga inchiu ṭhinte a bitum ber dawn a ni. Ruihhlo ngai hriatchian tawh zawng zawng zinga zaa 90 te hi kum 2020 ah chuan enkawlna pek vek a tum. Manipur Health Minister T Phungjathang leh Meghalaya Health Minister AL Hek pawh project hawnna inkhawmah hian an tel.

Jagat Prakash Nadda chuan sorkar laipuiin hmarchhak state-te a ngaihsak hle tih sawiin, damdawi hmanga inchiu ṭhinte avangin HIV a hluar zel chu pawi a tih thu a sawi.

Project Sunrise hi health ministry kal-tlanga National AIDS Control Organisation (NACO) hmalakna a ni. Hmarchhak biala HIV/AIDS chungchanga mipui hnena zirtirna pek zau chu an tum ber a ni.

Nadda hian Imphal-a Regional Institute of Medical Sciences (RIMS) tlawh nghalin, cheng vaibelchhe 202 senga RIMS-a block pakhat sakna tur lung a phum bawk. He block-ah hian casualty, community leh forensic medicine block, maternity ward bakah zirlai tana chenna tur hostel a awm ang.

Minister hi Lok Sabha MP pahnih Dr T Meinya leh Thangso Baite bakah BJP MLA pahnih Kh Joykishan leh Th Bishworjit ten an ṭawiawm a ni. RIMS thuneituten a hnena harsatna an thlen, RIMS in chak zawka hna an thawh theih nana harsatna awm ṭhinte chinfelsak chu minister hian a tiam bawk.