Bangladesh-ah diesel thawnchhuak dawn

Petroleum and Natural Gas Minister Dharmendra Pradhan chuan Assam ram chhunga Numaligarh tuialhthei thlitfimna aṭangin Bangladesh-ah India in diesel a thawnchhuak dawn tih a sawi.

Pipeline siam a la nih loh avangin a bul ṭan nan rel hmangin thawnchhuah a ni phawt dawn a, hemi chungchang hi Pakistan Prime Minister Energy Adviser Tawfiq-e-Elahi Chowdhury nen an sawi dun tawh thu Pradhan chuan a tarlang.

Bangladesh lama diesel hralh chhuah hi a ṭha dawn tih sawiin, Bangladesh chhuntu tur pipeline siam thuai a ni ang a ti. Chennai leh Paradip lawngchawlhna te chu Bangladesh-a Chittagong leh Mongla lawngchawlhna kaltlangin suihfinin, tuialhthei thawnchhuah tum a nih thu Minister hian a sawi.

Bangladesh hian leihnuaiah tuialhthei ṭhahnem tak a nei nia hriat a ni a, hemi zirchiang leh lachhuak tur hian ram hruaitute pawh an sawiho tawh.

Tunhnai khan oil corporation hotuten Bangladesh an tlawh tawh a, ram pahnihte thawh dunna hnuaia tuialhthei laihchhuah chungchang an sawi sawi.