Manipur court-in Meitei Leepun chief manna tur thupek a chhuah

Hnam leh hnam inkara inhuatna chawk tho leh, ram inpumkhatna tichhe thei zawnga thu a sawi avanga June thlaa Churachandpur police-te'n thubuai an siamsak, Meitei Leepun chief Pramot Singh chu Manipur court-in bail theih loha man a nihna tur thupek a chhuah.

Pramot Singh hi tualchhung buaina a nasat lai pawha social media leh TV vela Kuki-Zo hnamte hek leh hmuhsit zawnga thusawi ṭhinah puh a ni bawk.

Churachandpur chief Judicial Magistrate chuan Pramot Singh manna tur hi October 9 khan a chhuah tawh a, hei hi buaina a awm avanga police-te'n a awmna nia an hriat Imphal West an kal theih loh avang leh, Imphal West-a jurisdictional police hnena man tura an ti chung pawha chhanna an dawn loh vang niin court-ah hian an thlen a ni. Police-te chuan Code of Criminal Procedure (CrPC) section 41 hnuaiah Pramot Singh manna tur notice pawh an chhuah tawh thu an sawi a ni.

Singh-a kaihhruai Meitei Leepun hi thla nga chhung Manipur tualchhung buaina thlengah Kuki -Zo khuate bei tura inpun khawm ṭhinah puh an ni a, buaina chhuah ṭan tirh, May thlaah pawh khan Meitei Leepun leh anmahni ang tho Arambai Tenggol te chu police ralthuam dahna rawka puh an ni tawh bawk. Heng pawl pahnihte hian Meitei mipuite tana Sanamahi culture vawng nungtu ṭhalai pawl ve ve niin an insawi thung.

Manipur court-in Pramot Singh manna tur a tihchhuah hi June thlaa Churachandpur police-te ziah hmanga siam niin, IPC section 153A, sakhaw, pianna, hnam, chenna leh ṭawng avanga hnam leh hnam inkara inhuatna tuh te, 153B, ram inpumkhatna tichhe thei te, 500, intihhmingchhiat hremna te, 505, vantlang tana hnawka khawsaa puhna te a ni. Pramot Singh lakah hian Kangkopi police station-ah, IPC section 120B, 153A, 504, 505, 506 leh 34 hmangtein thubuai dang ziah luh a ni bawk a ni. Kangkopi police station-a thubuai theh luttu hi Kuki Sturdents' Organisation (KSO) te an ni a, Singh-a'n interview pakhata Kuki te chu pawn lam mi, Manipur mi dik tak ni lo anga a sawi avanga theh lut an ni.