Sikkim : Kuthnathawktu mi 8,733-te chhawmdawlna pe

Sikkim tuilianin chhiatna nasa tak a thlen avanga harsatna tawk hrang hrang zinga kuthnathawktu, E-building and Other Construction Workers (BOCW) welfare board hnuaia inziak lut mi 8,733 te chu Sikkim sorkar chuan chhawmdawlna, Rs. 10,000 ṭheuh a pe.

Chhawmdawlna pawisa hi Chief Minister PS Golay chuan tuilian avanga harsatna tawkte tana chhawmdawlna pek chhuahna hun, Chintan Bhawan, Gantok-a an hmannaah cheque-in a pe chhuak. Sorkarin ṭanpuina a pekte hi Sikkim sorkar hnuaia department hrang hrang hnuaia thawkte an ni hlawm a ni.

CM chuan chhawm­dawlna pawisa an pek chhuah zawng zawng chu Rs. vbc 8.70 a tlin thu sawiin,"Mi tam takin tuilian avangin an nunna an chan a, hei hi kan mangan hunlai a ni a, lui kam a chhiat vek avangin kuthnathawktute tan pawh a harsa tak zet a ni. Kuthnathawktu tam takte hian tuilian kara chhiatnaah ṭanpui leh chhanchhuah hna an theih ang tawkin an thawk nasa hle a, an thiltihte hriat leh lawm a ni tih lantir nan sorkar chuan anmahni chhawmdawlna pek tur atana ruahman Rs. 5,000 pawh tisangin, Rs. 10,000 hi kan pe ta a ni," a ti.

CM hian chhawm­dawlna pawisa pek chhuah hi tun dinhmunah BOCW welfare board hnuaia inziak lutte chauh pek an nih rih thu sawiin, board hnuaia inziak lut lote pawh a theihnghilh bik loh thu leh, tun aṭanga rei loteah pek an ni ve dawn niin a sawi bawk. CM chuan State Education department pawhin zirlai, tuilian avanga an zirlaibu chante tan pawh zirlaibu pek leh vek an nih tur thu a sawi.