Assam-ah eng chhit man sang avangin APDCL hnathawkte bei

Assam-a Bongaigaon district-a Boitamari police outpost hnuaia awm, Kayethbari Moukhowa-ah chuan Assam Power Distribution Corporation limited (APDCL) hnuaia hnathawkte chu khawtual mite'n eng chhit man sang avangin an bei.

APDCL hnathawk, mipui kut tuarte hi Asik Ali leh Anees Sheikh te an ni a, APDCL hian helai hmuna meter reading ti tura an tirhte an ni. Kayethbari Moukhowa an thlen hian an khuaa eng chhit man sang lutuk avanga mipui thinrim pung khawmin an hual nghal a ni. Mipui thinrim leh APDCL hnathawkte hi inhnial thinrimin mipui pung khawm kut an thlak ta a ni. Boitamari police outpost-a electricity department chuan FIR an theh lut nghal a ni. Asik Ali leh Anees Sheikh te hi mipuiin kut an thlak nasat lutuk hmain police te an thleng hman a, mipui thinrim pungkhawm zing aṭang hian pawt chhuakin an chhan thei a ni.

Kayethbari Moukhowa mipuite hian tun hnaia eng chhit man bill sang tak tak an dawn ṭhin thu sawiin, bill sang lutuk avang chuan an sum leh pai dinhmun a chhiat phah thu an sawi. Report ṭhenkhatin an tarlan danin helai hmuna eng chhitna bill hi ṭhenkhat chuan nuai chuang te an dawn thu leh ṭhenkhat chuan Rs. 50,000 te an dawn thu an sawi bawk.