Governor in a duh danin assembly session a ko thei lo: SC

Supreme Court chuan Thawhṭanni khan thuchhuah siamin, Arunachal Pradesh Governor Jyoti Prasad Rajkhowa chuan a duh leh ṭha a tih hunah assembly session koin, Chief Minister (chawlhtir tawh) Nabam Tuki-an thlawptu a neih tam leh tam loh a fiah thei lo tih a sawi.

Apex court constitution bench, Justices Jagdish Singh Khehar, Dipak Misra, Madan B. Lokur, Pinaki Chandra Ghosh leh N.V. Ramana ṭhutna chuan he thutlukna hi a siam a ni.

Court thutlukna hi senior ukil Rakesh Dwivedi thu thehluh chhanna niin, ani hian Speaker Nabam Rabia-an MLA aṭanga a ban tak 14 te aiawhin thu a thlen a ni. Dwivedi hi December 16-a Governor in assembly
ṭhutkhawm hmanhmawh a koh duhlotute tan a ding a ni.

MLA 14 te aiawh Dwivedi chuan governor hian Chief Minister-in sorkar siam tura thlawptu a nei tam lo tih an pawm a nih chuan a hnuah ziakin finfiahna neih a rem em tih a zawt phawt tur a ni, a ti.

Chief Minister in a remti lo a nih chuan, governor hian duhthlan tur pathum a nei a - Article 164 (1) anga sorkar ṭhiah, president hnena Article 356 hmang tura ngen emaw assembly session koh a ni. Justice Khehar ngaihdan chuan governor hian a duh thuin assembly a ko thei lo hrim hrim a, Justice Dipak Misra pawhin, 'Assembly koh theihna tur khawp thil a thleng lo" tiin a sawi ve bawk.

Dwivedi chuan chief minister hian assembly session neih a rawt duh lo a nih chauhin governor hian a thuneihna (discretionary power ) hmangin assembly session a ko thei a ni, a ti.

Attorney General Mukul Rohatgi chuan President rule puan a nih vanga petition thehluttute duh danin chief minister leh minister dang te office chu khar a ni vek tih Apex court hi a hrilh.