NE-ah Rs Vbc 1.3 hu investment kalpui dawn

Union Minister of State for Petroleum and Natural Gas Dharmendra Pradhan chuan Thawhlehni khan hmarchhak biala cheng vaibelchhe 1.3 hu investment kalpuina tur ' Hydrocarbon Vision 2030' a tlangzarh.

Hydrocarbon Vision 2030 tlangzarh tak hian hmarchhak mipuite tan hmasawnna leh hlawkna ṭha zawk a thlen dawn niin Pradhan chuan a sawi.

He ruahmanna in a tum ber chu hmarchhak biala leihnuai hausakna awmte lakchhuah, tuialhthei thianghlim zawk siam, tuialhthei awmna hriat zung zung, hmasawnna thlen leh mipui nawlpuite hlawkna tura hmalakte a ni. Hemi hnuaiah hian Arunachal Pradesh, Assam, Manipur, Meghalaya, Mizoram, Nagaland, Sikkim leh Tripura an awm. Ministry hian state sorkar nen inrawnkhawmna an nei zel dawn a ni.

Pradhan chuan ruahmanna thar hi mipuite, ruahmanna, thawhhona, hmalakna leh siamchhuah lamah a innghat tih sawiin, mipuite tih hian in tinin tuialhthei thianghlim an hmuh a, tualchhung mite hmasawnna leh thiamna pek tel a kawk tih a sawi. Ruahmanna tih hian tlangram chheng chhe taka chengte leh sik leh sa danglam zela chengte sum a ṭanpui a huam. Thawhhona chuan state sorkarte chu ruahmanna leh hnathawh hlawhtlin theih nan leh ṭhenawm ram nena insumdawn tawnna kalpui kawnga thawhhona a ni.

Hmalakna tih chuan hmarchhak ramte liquefied petroleum gas (LPG), natural gas, tuialhthei leh oil and lubricants inpek tawnna tur pipeline siam te; tuialhthei thlitfimna din thar leh lakluh te; compressed natural gas (CNG) kalkawng sial leh gas inpekchhawnna tur siamte a ni.

Siamchhuahna tih hian tuialhthei pekchhuak kawnga thil thar duante, rang leh awlsam zawka pekchhuah dan zawn te leh a pechhuaktute chawikan te a huam thung.

Union Minister chuan Hydrocarbon Vision 2030 in a tum pakhat leh chu kum 2030 thlen hma ngeia oil leh gas siamchhuah a leta tihpun; tuialhthei thianghlim thar tam, a semkualna rang zawk, hna tam zawk siam chhuah leh ṭhenawm ramte nen thawhhona ṭha siamchhuah a ni, a ti.